15 июля, глас 6
Тропарь воскресный, глас 6: Ангельския Силы на Гробе Твоем, / и стрегущии омертвеша, / и стояше Мария во гробе, / ищущи пречистаго Тела Твоего. / Пленил еси ад, не искусився от него, / сретил еси Деву, Даруяй живот: / Воскресый из мертвых // Господи, слава Тебе.
Тропарь Богородицы (ризы), глас 8: Богородице Приснодево, человеков Покрове, / ризу и пояс пречистаго Твоего телесé, / державное граду Твоему обложение даровала еси, / безсеменным Рождеством Твоим, нетленна пребывающи: / о Тебе бо и естество обновляется и время. / Темже молим Тя, мир граду Твоему даровати // и душам нашим велию милость.
Тропарь преп. Сергию Радонежскому, глас 4: Иже добродетелей подвижник, / яко истинный воин Христа Бога, / на страсти вельми подвизался еси в жизни временней, / в пениих, бдениих же и пощениих образ быв твоим учеником; / темже и вселился в тя Пресвятый Дух, / Егоже действием светло украшен еси. / Но яко имея дерзновение ко Святей Троице, / поминай стадо, еже собрал еси, мудре, / и не забуди, якоже обещался еси, / посещая чад твоих, // Сергие преподобне, отче наш.
Кондак воскресный, глас 6: Живоначальною дланию / умершия от мрачных удóлий / Жизнодавец воскресив всех Христос Бог, / воскресение подаде человеческому роду: / есть бо всех Спаситель, // Воскресение, и Живот, и Бог всех.
Слава, кондак преп. Сергию Радонежскому, глас 8: Христовою любовию уязвився, преподобне, / и Тому невозвратным желанием последовав, / всякое наслаждение плотское возненавидел еси / и, яко солнце, отечеству твоему возсиял еси; / тем и Христос даром чудес обогати тя. / Поминай нас, чтущих пресветлую память твою, да зовем ти: // радуйся, Сергие Богомудре.
И ныне, кондак Богородицы (ризы), глас 4: Одеяние всем верным нетления, / Богоблагодатная Чистая, / даровала еси священную ризу Твою, / еюже священное тело Твое покрывала еси, / Покрове всех человеков, / еяже положение празднуем любовию / и вопием со страхом Ти, Чистая: / радуйся, Дево, // христиан Похвало.
Прокимен воскресный, глас 6: Буди Господи, милость Твоя на нас, / якоже уповахом, уповахом на Тя.
Прокимен Богородицы, глас 3: Величит душа моя Господа, / и возрадовася дух мой о Бозе, о Бозе Спасе моем.
Причастны
Хвалите Господа с небес, хвалите Его в вышних.
Чашу спасения прииму и имя Господне призову. Аллилуия.
Стихира, глас 4: Ризу честную Твою, Богоблагодатная Владычице, / даровала еси граду Твоему, / богатство неотъемлемо; / покров же и славу, / и необориму стéну,/ и исцелений сокровище, / и чудес источник приснотекущий, / пристанище же спасительное обуреваемым всегда. // Сего ради поем Тя, Препетая Чистая.
(419)